Талатгюн,  декабр  айны  12-синде,  «Ёлдаш»  газетни  редакциясында 

Къарабудагъгент районну Гьели юрт орта школасыны охувчу яшлары ва 

муаллимлери  Хосар  Хосаров, Исбаният Мугьажирова  ва  Хадижат  Къа-

дырова болдулар. Гьели юртну охувчулары ва муаллимлери бизин булан 

кёпден берли къурдашлыкъ аралыкълар ва байлавлукъ юрюте. Бу гезик 

Гьелиден къурдашларыбыз «Ёлдаш» газетни юбилейи булан къутламагъа 

гелген эди. 

 

Бизин  газетни  ва  редакцияны 

100  йыллыкъ  юбилейи  булан  къут-

ламагъа  Гьели  юрт  орта  школаны 

оьрде  эсгерген  муаллимлери  булан 

бирче школадагъы  «Яш  къаламлар» 

деген  адабият  кружокну  ортакъчы-

лары да гелди. 

Газетни  къуллукъчулары  булан 

таныш болгъан сонг, Гьели юрт орта 

школаны ана тилден ва адабиятдан 

дарс  береген  муаллими  Исбаният 

Мугьажирова  газетни  къуллукъчу-

ларын  юбилей  булан  къутлады  ва 

булай деди:

–Бизин  юрт  Гьели,  гиччи  юрт 

буса  да,  юртубуздан  кёп  санавда 

белгили, пагьмулу, абурлу адамлар 

чыкъгъан.  Биз  олар  булан  оьктем 

болабыз.  Шолай  да,  «Ёлдаш»  газет 

бизин  юртгъа  бек  ювукъ.  Газетни 

гьар  сагьифасын,  гьар  макъаласын 

кёп сююп охуйбуз. Гьар тюрлю йыл-

ларда  «Ёлдашны»  редакциясында 

бизин  юртлулар  да  ишлеп  гелген. 

Оланы  арасында  бизин  юртлулар 

Вагьап  Загьиров  мухбир  болуп, 

Абдулхалыкъ Хабилов буса газетни 

редактору болуп чалышгъан. Бугюн 

бизин  охувчуларыбыз, школадагъы 

«Яш къаламлар» деген адабият кру-

жокну  ортакъчылары,  сизге  оьзлер 

язгъан шиъруланы охужакъ. 

Биринден бири гёзел ва пагьмулу 

къызлар  ва  уланлар  газетни  редак-

циясыны  къуллукъчулары  булан 

таныш болгъан сонг гьариси  «Ёлдаш-

ны»  юбилейине  багъышлап  язгъан 

шиъруланы чебер кюйде охуду. 

Охувчу  къыз  А.  Атаева  газетге 

багъышлап  шулай шиъру язгъан:

Аявлу «Ёлдаш» булан 

Мен гиччиден танышман. 

«Яшланы дюньясындан» 

Эпсиз бек къуванаман. 

Гьюрметли къардаш- къурдаш, 

Ёлдашгъа язылыгъыз.

Ялкъгъаныгъыз билмейли,

Арив оьтер йылыгъыз!

Р.  Салавова  оьзю  язгъан  шулай 

дёртлюгюн охуду:

Гьюрметли бизин «Ёлдаш»,

Юбилейинг къутлайбыз, 

Абурлу ишигизде 

Уьстюнлюклер ёрайбыз. 

С. Халилова язгъан шиъру сатыр-

ланы да сизин тергевюгюзге бериле:

Сен барынга къувана 

Уллулар да, яшлар да, 

Гьатта сени охуйлар 

90 йыллыкъ къартлар да.

 

«Ёлдаш» мухбирлерине 

Аллагьым савлукъ берсин,

Бары иши къурашып,

Оьрлюклеге де етсин. 

Охувчулар  шиъруларын  охуп 

битген  сонг,  «Ёлдаш»  газетни  баш 

редакторуну  заместители  Абдул-

къапур  Салимурзаев  газетни  гьа-

къында баянлыкъ берди:

–Газет, гертиден де, 100 йыллыкъ 

ёлну  оьтген.  Озокъда,  тынч  ёл  бол-

магъан.  100 йылны узагъында газет-

ни  чыгъарып  турмакъ,  уьстевюне, 

адамлар учун охулагъан къыйматлы 

макъалаланы  язып  чыгъармакъ 

тынч  иш  тюгюл.  Бугюнлерде, 

озокъда,  имканлыкълар  кёп,  тек 

алда  йимик  гьали  де  четимликлер 

болмай къалмай. Болса да гьар жума 

газетни  чыгъарабыз.  Газет  чыгъа-

гъан  биринчи  гюнден  тутуп, шолай 

чыгъарылып  да  гелген. Буссагьатда 

да  биринчи  чыкъгъан  газетлерин-

ден  башлап  бугюнлеге  ерли  бары 

да  номерлери  сакълангъан.  Бир 

миллетде  де  бизин  республикада 

шо кюйде, арты    уьзюлмей чыкъгъан 

газет  ёкъ.  Шолай  да,  аварланы  ва 

къазикъумукъланы  газетлери  де 

чыкъма  башлагъан  1917-нчи  йылда. 

Тек  оланы  газетлери  кёп  заманны 

узагъында чыкъмай да тургъан. 

Биринчи  къумукъ  газет  «Заман» 

арап  гьарплар булан 4-нчю апрелде 

1917-нчи йылда  чыкъгъан. Ону  арты 

булан  «Мусават»  деген  ат  булан 

да  газет  чыкъгъан. Мусават  –  тенг-

лик  демек.  Бу  ат  булан  газетни  48 

номери  чыкъгъан.  Олар  барысы  да 

бугюнлеге  ерли  сакълангъан.  Олар 

гьали архивде  . Бизде копиялары да 

бар.100 йыл алда язылгъан макъала-

ланы бирлерин 1990-нчы йыллардан 

тутуп, газетде берип де тургъанбыз. 

«Мусаватдан» сонг «Ишчи халкъ» 

деген  ат  булан  чыкъмагъа  башла-

гъан.  «Ишчи  халкъ»  –  инкъылапны 

газети.  1921-нчи  йылда  буса  газет 

«Ёлдаш» деген  ат  булан  чыкъмагъа 

башлагъан. «Дагъыстан фукъарасы» 

деген  ат  булан  да    чыкъгъан.  1931-

нчи  йылдан  1991-нчи  йылгъа  ерли 

газет  «Ленин  ёлу»  деген  ат  булан 

чыгъып турду. 1991-нчи йылдан сонг 

охувчуланы разилиги де булан «Ёл-

даш» деген атына къайтдыкъ. Муна 

бугюнлеге  ерли  «Ёлдаш»  газет  ара 

бёлмей чыгъып тура. 

Ёлугъувда  «Ёлдаш»  газетни  баш-

гъа къуллукъчулары да охувчулагъа, 

муаллимлеге  баракалла  билдирди, 

оьзлени  ёравларын  айтды.  Охувчу-

лар  ва  муаллимлер  буса  гележекде 

де «Ёлдаш» газет булан тыгъыс кюй-

де аралыкъ юрютмеге сёз берди.

Патимат БЕКЕЕВА.